Rydych yma : Hafan > Bro Ddyfi Hafan > Newyddion > Cytundeb Partneriaeth

Cytundeb Partneriaeth

1st Apr 2004

Partneriaeth Cymunedau Yn Gyntaf Bro Ddyfi

Cytundeb Partneriaeth

Gan weithio ag ystod eang o bartneriaethau a gan ymgynghori â phob rhan o'r gymuned, bydd y Bartneriaeth yn rhoi arweiniad ac yn cydlynu i hyrwyddo datblygiad cymdeithasol, economaidd ac amgylcheddol ardal Cymunedau yn Gyntaf Bro Ddyfi.

1. Rôl y Bartneriaeth

Bydd Partneriaeth Bro Ddyfi yn ceisio llwyddo yn hyn o beth trwy:

a) Weithio'n glos ag asiantaethau a mudiadau sy'n gweithio yn yr ardal

b) Dynodi bylchau yn narpariaeth gwasanaethau ac annog atebion

c) Cynyddu gallu grwpiau ac unigolion i'w galluogi i gael llais deallus o fewn proses Cymunedau yn Gyntaf ac i chwarae rhan weithgar ym mhroses Cymunedau yn Gyntaf, e.e. trwy ddatblygu a chyflwyno prosiectau perthnasol

d) Hyrwyddo dealltwriaeth ac ymwybyddiaeth o raglen Cymunedau yn Gyntaf

e) Gweithio i ddatblygu dealltwriaeth o broblemau cefn gwlad a'u heffeithiau ar y rhai sy'n dioddef o fod wedi'u dieithrio

f) Cytuno ar raglen waith gyda'r Cydlynydd

g) Rheoli proses ymgynghori barhaol

h) Monitro a gwerthuso gwaith a wnaed ar draws themâu.

2. Egwyddorion

a) Mae'r bartneriaeth yn cael ei harwain gan egwyddor 'tair rhan o dair'.

b) Bydd aelodau'r bartneriaeth yn ymrwymo i degwch, parch a thrafodaeth agored.

c) Bydd y bartneriaeth yn ymateb a chydnabod materion dwyieithrwydd, anabledd, hil, gender, oedran a diwylliant, bydd y cyfrifoldeb hwn yn un a rennir

d) Bydd aelodau'r bartneriaeth yn ymrwymo i ganlyniadau realistig y gellir eu mesur, a bydd yn sefydlu trefn fonitro ar gyfer targedau y cytunir arnynt.

e) Bydd y Bartneriaeth yn gwneud pob ymdrech resymol bob amser i sicrhau fod y gymuned gyfan yn gwybod beth sy'n digwydd.

3. Aelodaeth a Chynrychiolaeth

a) Bydd pawb sy'n coleddu egwyddorion Cymunedau yn Gyntaf ac yn byw neu'n gweithio ym Mro Ddyfi yn gymwys i ymgeisio i fod yn aelod o Bartneriaeth Bro Ddyfi. Serch hynny, bydd uchafswm o ugain aelod bob amser.

b) Bydd yn ddelfrydol bob un o'r pedair ardal ddaearyddol gael dau gynrychiolydd a fyddant hefyd yn cynrychioli'r sector cymunedol. (Bydd trigolion o'r pedair ardal ddaearyddol yn nodi pa ardal y maent yn ei chynrychioli)

c) Bydd y 12 lle sy'n weddill yn adlewyrchu'r egwyddor tair rhan o dair. (h.y. 6 o'r sector busnes/gwirfoddol a 6 o'r sector statudol)

d) Dylid adolygu'r trefniadau aelodaeth yn y cyfarfod arbennig a drefnir 12 mis wedi'r cyfarfod arbennig blaenorol.

e) Bydd aelodaeth am gyfnod cychwynnol o 12 mis.

f) Cyhoeddir dyddiad a lleoliad y 12 cyfarfod arbennig misol yn y wasg leol o leiaf un mis cyn i'r cyfarfod gael ei gynnal, er mwyn rhoi gwybod bod rhaid i'r cydlynydd dderbyn unrhyw enwebiadau ar gyfer aelodaeth o Bartneriaeth Cymunedau yn Gyntaf Bro Ddyfi o leiaf 14 diwrnod cyn y cyfarfod. Dylid nodi'r sector neu ardal y mae'r enwebai yn dymuno ei gynrychioli bryd hynny, hefyd.

g) Pe bai mwy o bobl yn dymuno cynrychioli unrhyw un o'r tri sector nag o leoedd sydd ar gael, yna bydd etholiadau'n cael eu cynnal yn y sector neu'r ardal honno.

h) Yn achos cynrychioli'r gymuned, pe bai mwy o enwebiadau i gynrychioli unrhyw un o'r pedair ward nag o leoedd ar gael, bydd pleidlais trwy'r post yn cael ei chynnal, gyda'r bobl o'r ward honno, sydd wedi cofrestru eu manylion cyswllt ar restr bostio Cymunedau yn Gyntaf, yn gymwys i bleidleisio. Bydd unrhyw un sydd wedi dangos diddordeb yn rhaglen Cymunedau yn Gyntaf Bro Ddyfi, ac sydd am gael clywed am ddatblygiadau'r rhaglen yn cael cofrestru i fod ar y rhestr bostio. Bydd y rhestr yn cael ei diweddaru'n gyson wrth i bobl gofrestru.

i) Bydd gofyn i asiantaethau statudol a mudiadau gwirfoddol/busnesau drefnu etholiadau eu hunain.

j) Bydd aelodau yn dynodi pa sector y maent yn ei gynrychioli ac yn ymdrechu i fod yn sianel cyfathrebu dwy-ffordd gyda'r sector neu cymuned maent yn cynrychioli.

k) Gall y Bartneriaeth wahodd mudiadau neu unigolion eraill i ymuno fel ymgynghorwyr fel yn ôl yr angen.

l) Bydd gan bob aelod un bleidlais; bydd penderfyniadau yn cael eu gwneud trwy gonsensws lle bo hynny'n bosibl.

m) Bydd aelodaeth yn dod i ben os na fydd aelod yn bresennol mewn tri chyfarfod ar ôl ei gilydd heb esboniad.

4. Grymoedd

a) Bydd corff atebol yn cael ei ddynodi gan Bartneriaeth Bro Ddyfi i gynnal gweithgareddau sylfaenol Partneriaeth Bro Ddyfi ar ei rhan.

b) Mae gan y Bartneriaeth rym i wneud trefniadau â'r corff atebol a mudiadau eraill ar faterion cyflogaeth, rhentu/llogi, casglu arian, codi yswiriant a gweithgareddau eraill Cymunedau yn Gyntaf yn ôl yr angen.

c) Bydd gan y Bartneriaeth y grym i sefydlu is-bwyllgorau yn ôl yr angen.

d) Mae gan y Bartneriaeth rym i agor ei chyfrif banc ei hunan

e) Mae gan y Bartneriaeth rym i wneud unrhyw beth cyfreithlon arall a allai ei chynorthwyo i lwyddo yn ei hamcanion.

5. Cyfarfodydd

a) Bydd y Bartneriaeth yn cyfarfod o leiaf chwe gwaith y flwyddyn.

b) Bydd cyfarfod arbennig yn cael ei gynnal unwaith y flwyddyn, ond heb fod yn hwy na 18 mis ar ôl y diwethaf.

c) Gall cyfarfodydd arbennig gael eu galw gan y cadeirydd trwy ymgynghori ag un aelod arall. Bydd angen tair wythnos o rybudd, a bydd eu hangen os bydd penderfyniad i newid unrhyw ran o'r Cytundeb hwn.

d) Bydd aelodau'r Bartneriaeth yn penodi eu cadeirydd ac is-gadeiryddion eu hunain yn y cyfarfod cyntaf ac ar ôl pob cyfarfod arbennig.

e) Bydd 1/3 o'r Bartneriaeth, heb ystyriaeth o'r sector a gynrychiolir, yn ffurfio cworwm. Rhaid i hyn gynnwys o leiaf 1 aelod cymunedol.

Top

Back to Main News Page